████████╗██████╗░██╗██████╗░██╗░░░██╗██████╗░░█████╗░  ████████╗░█████╗░██╗░░░░░██╗░░░░░██╗██╗░░██╗░█████╗░
╚══██╔══╝██╔══██╗██║██╔══██╗██║░░░██║██╔══██╗██╔══██╗  ╚══██╔══╝██╔══██╗██║░░░░░██║░░░░░██║██║░██╔╝██╔══██╗
░░░██║░░░██████╔╝██║██████╔╝██║░░░██║██████╔╝███████║  ░░░██║░░░███████║██║░░░░░██║░░░░░██║█████═╝░███████║
░░░██║░░░██╔══██╗██║██╔═══╝░██║░░░██║██╔══██╗██╔══██║  ░░░██║░░░██╔══██║██║░░░░░██║░░░░░██║██╔═██╗░██╔══██║
░░░██║░░░██║░░██║██║██║░░░░░╚██████╔╝██║░░██║██║░░██║  ░░░██║░░░██║░░██║███████╗███████╗██║██║░╚██╗██║░░██║
░░░╚═╝░░░╚═╝░░╚═╝╚═╝╚═╝░░░░░░╚═════╝░╚═╝░░╚═╝╚═╝░░╚═╝  ░░░╚═╝░░░╚═╝░░╚═╝╚══════╝╚══════╝╚═╝╚═╝░░╚═╝╚═╝░░╚═╝

Tripurā Tallikā Research and Publishing Group
www.tripuratallika.org

©2024 Tripurā Tallikā. All Rights Reserved.
E-texts may be viewed online or downloaded for private study.
E-texts may not, under any circumstances, be copied, republished, reproduced, distributed or sold, either in original or altered form, without the express permission of Tripurā Tallikā in writing.

Disclaimer: Etexts are prepared by the Tripurā Tallikā team as a service to scholars, practitioners, and the international Śrīvidyā community and may contain typos, errors, and other mistakes. Every effort has been made to present the most accurate transcriptions possible, without emendation (diplomatic transcription), from the source materials into the International Alphabet of Sanskrit Transliteration (IAST).

Author: Amṛtānanda

Title: Cidvilāsastavaḥ

Source: Dwiveda, Vrajavallabha (ed). Nityāṣoḍaśikārṇavaḥ: Śivānandakṛtayā ṛjuvimarśinyā Vidyānandakṛtayā Artharatnāvalyā ca Saṃvalitaḥ. 2. Saṃskaraṇam. Vārāṇasyām: Sampūrṇānanda-Saṃskṛta-Viśvavidyālayaḥ. pp. 322-330. 1985.

Description: The Cidvilāsastava by Amṛtānanda, also known as Amṛtānandanātha and Amṛtānandayogin (fl. c. 1325-1375), is one of the most comprehensive treatments of the esoteric contemplation of ritual found within the Śrīvidyā tradition and Śaiva tantra in general. This short forty-verse hymn offers esoteric knowledge and creative contemplations (bhāvanā) for critical steps in the ritual worship of Tripurasundarī. Although belonging to the Śrīvidyā tradition, the Cidvilāsastava will likely be of great interest to all who perform pūjā as many of the verses deal with topics and procedures that are common to all traditional forms of ritual worship.
Dwiveda, page 322

cidvilāsastavaḥ
amṛtānandayogiviracitaḥ

svaprakāśaśivamūrtirekikā tadvimarśatanurekikā tayoḥ |
sāmarasyavapuriṣyate parā pādukā paraśivātmano guroḥ || 1 ||

citrabhānuśaśibhānupūrvakatritribhedaniyateṣu vastuṣu .
tattadātmakatayā vimarśanaṃ tatsamaṣṭigurupādukājapaḥ || 2 ||

tīrthamadvayasudhārasodadhervāritaṃ nijavimarśavelayā |
āṇavādimalamocanocitaṃ snānamatra vidhinā nimajjanam || 3 ||

sā niśā sakalalokamohanī vāsaraḥ sa khalu sarvabodhakaḥ |
sāmarasyamiha sandhiretayoḥ śrīparaiva nanu sāndhyadevatā || 4 ||

svaprakāśaśiva eva bhāskarastadvimarśavibhavā marīcayaḥ |
yaiḥ sa bhāsayati vedyamaṇḍalaṃ tasya pūjanamahantayā matiḥ || 5 ||

cidvilāsamayabhittibhāvitaṃ jñānadīpavigalattamoguṇam |
ātmatattvamiha yāgamaṇṭapaṃ tasya pūjanavidhānamarcanam || 6 ||

Dwiveda, page 323

bhedalakṣaṇavipakṣasaṅkaṭāttāraṇaṃ paramihātmarakṣaṇam |
saṃvidātmakatayā vimarśanaṃ bandhanaṃ bhavati sarvato diśām || 7 ||

vedikā hṛdayapadmakarṇikā cinmayī vasati tatra devatā |
yo hi tadyajanakarmakarmaṭhastasya pāśabhiduraḥ sa bhairavaḥ || 8 ||

viśvabhedavibhavā vikalpadhīlakṣaṇā bhavati vighnasantatiḥ |
nirvikalpanijadhāmaviśramastannirākaraṇamatra kīrtitam || 9 ||

yatra nirviṣayabodhalakṣaṇaḥ svātmaśambhuravatiṣṭhate 'niśam |
tattvajālakamidaṃ śivāvadhi kṣamāmukhaṃ sakalamāsanaṃ matam || 10 ||

​​​​ātmatattvagatayoraśuddhayoratra karmakaraṇātmanordvayoḥ |
śuddhatattvalayabhāvanāmayī śuddhirātmakarayoḥ parā matā || 11 ||

vedyasaṃvida idaṃsphurātmano vetṛsaṃvidi vilāpanāmayī |
vṛttiradvayavimarśavigrahā prāṇasaṃyatirudīritottamā || 12 ||

āsanāni navacakrasaṃvidāmudbhavasthitilayāstriśastriśaḥ |
aṅgaṣaṭkaracanā ṣaḍadhvanāmaṃśatāvagatirātmasaṃvidaḥ || 13 ||

Dwiveda, page 324

kāma ūrdhvagatabindurānanaṃ bhānureṣa tadadhogatau stanau |
citrabhānuśaśināvubhau kalā yoniratra saparārdhakuṇḍalī || 14 ||

evamātmani catuṣkalāmaye sarvatattvasamavāyalakṣaṇe |
nyāsamāhuriha vaikharītivāgvṛttitaḥ samaviśeṣabhāvanam || 15 ||

pūruṣatvasamavāptihetupuryaṣṭakākhyanijasūkṣmavarṣmaṇaḥ |
citpade layavidhānamaṣṭavāgdevatānyasanamiṣṭamuttamam || 16 ||

antaraṅgakaraṇānyupādhayaḥ svaprakāśanabhaso 'tra saṅkramāt |
pīṭhabhāvamupayānti tāni tannyāsakarma paradhāmni hṛllayaḥ || 17 ||

tattvadhāmayugamātṛkātmakatritribhedaniyateṣu vastuṣu |
pānapātraparamāmṛtatrayaṃ turyaviśramaṇamarghyaśodhanam || 18 ||

medinīpramukhamāśivaṃ mataṃ tattvacakramiha cakramuttamam |
svasvabhāvasamavāyabhāsinī devatā bhavati sāṃvidī kalā || 19 ||

āntarasya nijasaṃvidātmano māturakṣakaraṇādhvanā bahiḥ |
meyasaṃvidi samarpaṇaṃ tadāvāhanaṃ samarasatvalakṣaṇam || 20 ||

Dwiveda, page 325

pañcadhaiva yadidaṃ prapañcitaṃ pañcadhānubhavaśāśvatodayam |
tatsusaṃharaṇamaupacārikaṃ karma nirmalanijātmasaṃvidi || 21 ||

yastu pañcadaśadhā prakalpyate kāla eṣa śaśibhānusaṃkramāt |
tasya śāśvatapade layakriyā nityavāsarakalārcanaṃ matam || 22 ||

bāhyacakrasuṣagā marīcayastattvajālalasadātmasaṃvidaḥ |
tatsamarcanamatīva cinmayānākhyadhāmni vilayakramakriyā || 23 ||

yaccaturvidhamidaṃ vibhāsate tattvarūpamamṛtāntarākṛti |
tasya pañcamapade layakriyā saṃmataṃ balicatuṣṭayaṃ tathā || 24 ||

pañcadhā prasarataścidātmano hyāntarasya bahirindriyādhvanā |
sāmarasyamiha saṃvidātmanārātrikaṃ paramidaṃ samīritam || 25 ||

vāk sahaiva manasā nivartate prāpyaniṣkalanirañjanādyataḥ |
tatra nirmanasi śabdavarjite dhāmni viśramaṇāmuttamo japaḥ || 26 ||

bimbitaṃ sphurati yatra saṃvido rūpamāntaramidantayā bahiḥ |
viśvametadakhilaṃ carācaraṃ darpaṇaṃ hṛdayadarpaṇaṃ param || 27 ||

chādayannikhalamātmasaṃvidā trāyate trividhatāpasaṃkaṭāt |
yaccidambaragataṃ śivātmakaṃ chatramatra kamalaṃ sudhāmalam || 28 ||

Dwiveda, page 326

pañcadhā sphuraṇameva saṃvidaścāmaraṃ vividhacārucaṅkramam |
viśvadṛglayavicitranirmitaḥ svekṣaṇakṣaṇabhavo bhavastavaḥ || 29 ||

eṣaṇātrayamayasya varṣmaṇastattvasaṃcayamayasya saṃvidi |
dhāmni tattvasamatītasattvake svātmanaḥ khalu nivedanaṃ matam || 30 ||

svaprakāśavapuṣā guruḥ śivo yaḥ prasīdati padārthamastake |
tatprasādamiha tattvaśodhanaṃ prāpya modamupayāti bhāvukaḥ || 31 ||

pāśajālakamidaṃ paraṃ paśornāśakāraṇamato mataṃ haviḥ |
tattvato nijagurornirīkṣaṇātprāpyate tadamalaṃ pavitram || 32 ||

vedyarāśidamanena viśvato nirvikalpamayavāsanolbaṇam |
cittameva damanaṃ śive 'mukasyārpaṇaṃ damanakārpaṇaṃ param || 33 ||

dīyate paraśivaikyabhāvanā kṣīyate sakalapāpasaṃcayaḥ |
yena cijjaladhipārasetunā dīkṣaṇaṃ gurukaṭākṣavīkṣaṇam || 34 ||

Dwiveda, page 327

antaraṅgakaraṇātmanāṃ catuḥsrotasāṃ vividhadevatājuṣām |
pūjanaṃ paramihonmanīśikhāmadhyavartiparamātmayojanam || 35 ||

pañcabodhakaraṇāni mānasaṃ darśanāni viṣayapradarśanāt |
darśanāni ṣaḍamūni tāni tatpūjanaṃ bhavati tallayaściti || 36 ||

jāgradādisamayāścaturvidhāścāntarātmaparamātmavigrahāḥ |
pañcame 'tra tadatītacidghane dhāmni tallayamatistadarcanam || 37 ||

khe nirastanikhilakriyākrame yā citiścarati śāśvatodayā |
sā śivatvasamavāptikāriṇī khecarī nikhilakhedahāriṇī || 38 ||

yatsvarūpamahimā vikalpitaṃ śakticakramiha rajjusarpavat |
tatsvarūpaparamārthabodhatastatra tasya vilayo visarjanam || 39 ||

yā kriyā samabhihāratastridhā darśitātra gurubhāvanādikā | 
sā vibhedalayabhāvanādikābhyasyatāṃ paraśivaikyasiddhaye || 40 ||

iti cidvilāsastavaḥ samāptaḥ ||

Dwiveda, page 328

prakṣiptā adhikā vā ślokāḥ

yat tvagādinijadhātusaptakaṃ tatsamaṣṭiriha cāṣṭakaṃ tanau |
tattadaṅgavilayakriyoditaṃ tvaṣṭakāṣṭakasamarpaṇaṃ param || 41 ||

dṛkkriyātmaśaśibhānumadhyagaṃ khe caratyanalayaṣṭidhāma yat |
yattadūrdhvaśikharaṃ paraṃ nabhastatra darśaya śivaṃ tvamambike || 42 ||

ātmasaṃvidanale śivātmani vāsanendhanavivṛddhatejasi |
vṛttipañcakahavissamarpaṇaṃ homamatra kathitaṃ manīṣibhiḥ || 43 ||

yā śivaikyaviṣayā manaḥ kriyā pratyagunmukhatayā śivastriyā |
pūjanādivividhakriyālayaḥ svātmasaṃviditi hi kṣamāpaṇam || 44 ||

******************************************************************** |
ātmacakramanudevatātmanāmāsanaṃ śivamayatvabhāsanam || 45 ||