████████╗██████╗░██╗██████╗░██╗░░░██╗██████╗░░█████╗░  ████████╗░█████╗░██╗░░░░░██╗░░░░░██╗██╗░░██╗░█████╗░
╚══██╔══╝██╔══██╗██║██╔══██╗██║░░░██║██╔══██╗██╔══██╗  ╚══██╔══╝██╔══██╗██║░░░░░██║░░░░░██║██║░██╔╝██╔══██╗
░░░██║░░░██████╔╝██║██████╔╝██║░░░██║██████╔╝███████║  ░░░██║░░░███████║██║░░░░░██║░░░░░██║█████═╝░███████║
░░░██║░░░██╔══██╗██║██╔═══╝░██║░░░██║██╔══██╗██╔══██║  ░░░██║░░░██╔══██║██║░░░░░██║░░░░░██║██╔═██╗░██╔══██║
░░░██║░░░██║░░██║██║██║░░░░░╚██████╔╝██║░░██║██║░░██║  ░░░██║░░░██║░░██║███████╗███████╗██║██║░╚██╗██║░░██║
░░░╚═╝░░░╚═╝░░╚═╝╚═╝╚═╝░░░░░░╚═════╝░╚═╝░░╚═╝╚═╝░░╚═╝  ░░░╚═╝░░░╚═╝░░╚═╝╚══════╝╚══════╝╚═╝╚═╝░░╚═╝╚═╝░░╚═╝

Tripurā Tallikā Research and Publishing Group
www.tripuratallika.org

©2024 Tripurā Tallikā. All Rights Reserved.
E-texts may be viewed online or downloaded for private study.
E-texts may not, under any circumstances, be copied, republished, reproduced, distributed or sold, either in original or altered form, without the express permission of Tripurā Tallikā in writing.

Disclaimer: Etexts are prepared by the Tripurā Tallikā team as a service to scholars, practitioners, and the international Śrīvidyā community and may contain typos, errors, and other mistakes. Every effort has been made to present the most accurate transcriptions possible, without emendation (diplomatic transcription), from the source materials into the International Alphabet of Sanskrit Transliteration (IAST).

Author: Amṛtānanda

Title: Saubhāgyasudhodayaḥ

Source: Dwiveda, Vrajavallabha (ed). Nityāṣoḍaśikārṇavaḥ: Śivānandakṛtayā ṛjuvimarśinyā Vidyānandakṛtayā Artharatnāvalyā ca Saṃvalitaḥ. 2. Saṃskaraṇam. Vārāṇasyām: Sampūrṇānanda-Saṃskṛta-Viśvavidyālayaḥ. pp. 306-321. 1985.

Description: The Saubhāgyasudhodaya by Amṛtānanda, also known as Amṛtānandanātha and Amṛtānandayogin (fl. c. 1325-1375), is a short work in six chapters. Noteworthy aspects of this composition include: foundational knowledge about how early exponents of Śrīvidyā understood their lineage in the light of the Pratyabhijñā and other Śaiva traditions developed in Kashmir; the supremacy of their tradition in relation to other Kaula transmissions; and Amṛtānanda's guru lineage.



Dwiveda page 306

saubhāgyasudhodayaḥ
amṛtānandayogiviracitaḥ

prathamaḥ prapaṇcaḥ

jayati jyotiranuttaramidamakhilaṃ yasya bhāsate bhāsā |
sā bhāsayati yan na bhānur na śītabhānuḥ kuto bṛhadbhānuḥ ||1||
svābhāvikī sphurattā vimarśavapur asya vidyate śaktiḥ |
saiva carācaram akhilaṃ janayati jagadeta(va?da)vati saṃharate ||2||
tasya nirupādhimūrter nikhilātītasya nityatṛptasya | 
sasāramohasaṃbhramasaṃgatir anayaiva santataṃ bhavati ||3||
seyaṃ tadaikarasyāt parā parāmarśarūpiṇī śaktiḥ | 
svasvātantryollāsaspandādekā 'py anekadhā vitatā ||4|| 
prathamaṃ paśyantyādiprakārabhedaprapañcitākārā | 
viśvottīrṇānāhatanādamayī saiva mātṛkā jātā ||5|| 
akhilamanāhatamūrtirmātyuttīrṇasvarūpiṇī tarati |
kāyati nānānāmaprapañcarūpeṇa mātṛkā devī ||6||

Dwiveda page 307

nijabhāgāhavirbhāgā(?) paryāsasamāsaikarasyabhedama(yi?yī) |
ekā 'py ekādaśa(vā?dhā) jātā mātā paraiva paśyantī ||7||
[paśyati sarvaṃ svātmani karaṇānāṃ saraṇim api yad uttīrṇā | 
teneyaṃ paśyantītyuttīrṇety apy udīryate mātā ||]
paśyantya(ā)ḥ paramārthaḥ sva(ā)vayavā (pya?vya)ṣṭayo 'ṣṭa vāmā (sā?dyāḥ) | tābhyaḥ samaṣṭirūpe na sāmarasyaṃ ca tattvato bhinnam ||8||
ekaikarasyarūpā parā 'parā 'ṣṭāṃśamātṛparamārthā | 
tābhyām anāhatākhyā nādamayī madhyamā 'bhavan mātā ||9||
sthānādibhir ahatatvād buddhivyāpāramātrabodhyatvāt | 
mātā 'nāhatanāmā sūkṣmā vikṛtādinādanavakamayī ||10||
sūkṣmaiva madhyameyaṃ nādamayī sthūlabhāvam āpannā | dvyuttaracatvāriṃśadvarṇātmakavarganavakarūpeṇa ||11||
paśyantīva na kevalam uttīrṇā nāpi vaikharīva bahiḥ | 
sphuṭataranikhilāvayavā madhyagatā madhyamā tayo(ra?rya)smāt ||12||
parayā 'parayā pādādyaṣṭavyaṣṭyātmanā ca paśyantyā | 
mātrā madhyamayā navavargātmikayā ca vaikharī jātā ||13||
sthānakaraṇaprayatnair abhihatapavanapravartitārṇatvāt | 
hatanāmadheyam asyā vihitaṃ varṇodayakramābhijñaiḥ ||14||

Dwiveda page 308

'avadhāraṇe(dra?tra) vai (ve?ce)damakṣe vivare ca kha gatau rīti | karṇavivaraikagamyasvārṇeyaṃ vaikharī yato mātā ||15||
daśa pañca ca bindvantāḥ svarā matāḥ pratipadāditithirūpāḥ | raviśaśisargaspandaprabhavā hi bhavanti te tadātmānaḥ ||16||
raviśaśirūpau bindū śivaśaktimayau tadātmakaḥ sargaḥ | 
sattodrekaś ca tayoḥ śivaśaktyos tatsvabhāvato 'vasthe ||17||
sattā śivas tadaṃśā vāmā jyeṣṭhā tathaiva raudrī syāt | 
etā evānuttaram icchonmeṣaś ca samabhava(d?n) hrasvāḥ ||18||
udrekaḥ śaktiḥ syād icchā jñānā kriyā ca śaktyaṃśāḥ | 
dīrghāstā evāsannānandaś ceśanonatā ceti ||19||
asvaravapurādiśivaḥ paraḥ pramātā svasaṃvidunmeṣāt | 
icchati veditum arthānīśanayā tadanu vetti bhinnagatiḥ ||20||
icchāveśānantaram asmin prāgīśanodayānmadhye | 
vyaktāvyaktārthamayā(ḥ) ṣaṇḍhā iccheśanodbhavā varṇāḥ ||21||
icchānuttarayogād vihitā śa(ktiḥ?kti)svarasya saṃbhūtiḥ | 
ekārānuttarayoḥ saṅgād aikārasaṃbhavo bhavati ||22||
unmeṣānuttarayoḥ saṅgād okārajanma nirṇītam | 
okārānuttarayoḥ saṅgāc chaktitriśūlaniṣpattiḥ ||23||
vedanarūpo binduḥ śivaśaktidvitayasāmarasyatanuḥ | vedakavedyavibhāgasvarūpasaṃkocarūpasaṃskāraḥ ||24||

Dwiveda page 309

raviśaśisaṃcaraṇavaśād yathaiva vikasanti santataṃ tithayaḥ | 
tanmayasargaspandād unmiṣitās te svarās tadātmānaḥ ||25|| 
sargeṇa kādivarṇair api ṣaṭtriṃśadbhir ātmano 'vayavaiḥ | 
ṣaṭtriṃśattattvamayaṃ jagadāvṛṇute śivātmakaṃ mātā ||26|| 
śaktir na śivena vinā śivo 'pi na tayā vinā 'sti tadvad idam | 
viśvaṃ vāgarthamayaṃ śivaśaktyullāsasaṃbhavaṃ bhāti ||27|| 
yad ayam anuttaramūrtir nijecchayā nikhilam api jagat sraṣṭum | 
paspande sa spandaḥ prathamaṃ śivatattvam ucyate tajjñaiḥ ||28||
icchā saiva svacchā santatasamavāyinī parā śaktiḥ | 
sacarācarasya jagato bījaṃ nikhilasya nijanilīnasya ||29|| 
svecchāśaktyudgīrṇaṃ jagadātmāhantayā samācchādya | 
nivasan sa eva nikhilānugrahanirataḥ sadāśivo 'bhimataḥ ||30|| 
viśvaṃ sa eva paśyann idantayā nikhilam īśvaro jātaḥ | 
sā bhavati śuddhavidyā yedantāhantayor abhedamatiḥ ||31|| 
māyā vibhedabuddhir nijāṃśabhūteṣu nikhilabhūteṣu | 
nityaṃ tasya niraṅkuśavibhavaṃ veleva vāridhiṃ rundhe ||32|| 
sa tayā parimitamūrtiḥ saṃkucitasamastaśaktir eṣa pumān | 
ravir iva sandhyāraktaḥ saṃhṛtaraśmiḥ svabhāsane 'py apaṭuḥ ||33|| sampūrṇakartṛtādyā yā bahvyaḥ santi śaktayas tasya | 
saṃkocāt saṃkucitāḥ kalādirūpeṇa rūṣayanty enam ||34||
yatsarvakartṛtā sā saṃkucitā katipayārthamātṛparā | 
kiñcitkartāram amuṃ kalayantī kīrtyate kalānāmnā ||35||

Dwiveda page 310

sarvajñatā 'sya śaktiḥ parimitatanur alpavedyamātṛparā | 
jñānamupapādayantī vidyeti nigadyate budhair ādyaiḥ ||36|| 
nityaparipūrṇatṛptiḥ śaktis tasyaiva parimitā tu satī | 
bhogeṣu rañjayantī satatam amuṃ rāgatattvatāṃ yātā ||37||
yā nityatā 'sya śaktir nikṛṣya nidhanodayapradānena |
niyataparicchedakarī klṛptā syāt kālatattvarūpeṇa ||38||
yā 'sya svatantratākhyā śaktiḥ saṃkocaśālinī saiva | 
kṛtyākṛtyeṣv avaśaṃ niyatam amuṃ niyamayanty abhūn niyatiḥ ||39||

icchāditrisamaṣṭiḥ śaktiḥ śāntā 'sya saṃkucadrūpā | 
saṃkucitecchādyātmakasattvādikasāmyarūpiṇī tu satī ||40||
buddhyādisāmarasyarūpā cittātmikā matā prakṛtiḥ | 
icchā 'sya rajorūpā 'haṅkṛtir āsīd ahaṃpratītikarī ||41||
jñānā 'sya sattvarūpā nirṇayabodhasya kāraṇaṃ buddhiḥ | 
tasya kriyā tamomayamūrtir mana ity ucyate vikalpakarī ||42||
vāgādipañcabhedaiḥ sa eva saṃkucitavigraho devaḥ | 
jñānakriyoparāgaprādhānyād vividhaviṣayarūpo 'bhūt ||43||
śrotraṃ cakṣuḥ sparśanajihvāghrāṇāni bodhakaraṇāni |
vākpāṇipādapāyūpasthākhyāni karmakaraṇāni ||44|| 
śabdasparśau rūpaṃ rasagandhau ceti bhūtasūkṣmāṇi | 
ayam evātinikṛṣṭo jāto bhūtātmanā 'pi bhūteśaḥ ||45||
gaganam anilaś ca tejaḥ salilaṃ bhūmiś ca pañca bhūtāni |
śrotrādikaraṇavedyāḥ śabdādyās tāni vedakāny eṣām ||46||

Dwiveda page  311

vacanakarī vāg āsīt pāṇiḥ syāt karaṇabhūtam ādāne | 
gamanavisargānandatritaye pādādikatrikaṃ karaṇam ||47|| 
gandhavatī bhūmiḥ syād āpaḥ sāṃsiddhikadravās tejaḥ | 
uṣṇasparśaviśiṣṭaṃ sasparśo vāyur ambaraṃ śabdaḥ ||48||
māyāntam ātmatattvaṃ vidyātattvaṃ sadāśivāntaṃ syāt | 
śaktiśivau śivatattvaṃ turīyatattvaṃ samaṣṭir eteṣām ||49|| 
caturātmikeyam eṣā parādirūpaprapañcabhedavatī | 
sṛṣṭisthitisaṃhārānākhyākhyāṃś caturo 'nvayānabhivyāptā ||50||

iti śrīmadamṛtānandayogiviracite saubhāgyasudhodaye prathamaḥ prapañcaḥ ||

dvitīyaḥ prapañcaḥ

saiva mahāvidyātmā mātā caturanvayaikaviśrāntiḥ |
caturānanādijananī jātā caturātmavargaphaladātrī ||1|| 
asvaravimarśarūpau svāṃśau hitvā catuṣkalau saiva | 
vāmādīcchādimayānyakarod dvandvānyamūni catvāri ||2|| 
vāmāṃśo brahmā syād icchaiva tasya bhāratī śaktiḥ | 
anayor etanmithunaṃ sṛṣṭiḥ prāganvayātma vāgbījam ||3|| 
jyeṣṭhāṃśo viṣṇuḥ syāj jñānā viśvambharā tayor mithunam | 
idam eva dakṣiṇānvayarūpaṃ śrīkāmarājamadhyāste ||4||

Dwiveda page 312

raudryātmakas tu rudraḥ kriyāmayī śaktir asya rudrāṇī | 
yugalam idaṃ tārtīyaṃ bījaṃ pālayati paścimāmnāyam ||5||
syād ambikāsvarūpaḥ śambhuḥ śāntātmikā 'sya śaktiḥ syāt | 
mithunam idaṃ śivaśaktyor uttarasamayātma turyam adhitiṣṭhet ||6|| 
evam anuttaraśaktyoś caturaṃśadvandvarūpiṇī parā jātā | 
caturanvayātmikeyaṃ paśyantī mātṛkāmayī vidyā ||7|| 
sṛṣṭiḥ pūrvāmnāyo vāgbhavabījaṃ tadātmakaṃ trividham | 
sṛṣṭisthitisaṃhārair bhinnā sṛṣṭis trimūrtimūrtiḥ syāt ||8|| 
brahmā 'tra sṛṣṭisṛṣṭāv adhipatir etasya bhāratī śaktiḥ | 
so 'yaṃ hasyārthaḥ syāt sa eva śivaśaktivācakaścāpi ||9||
hasyārthaḥ syād atra svaśaktimayarūpasārṇasaṃyogāt | 
sṛṣṭisthitau tu viṣṇuḥ kartā viśvambharā 'sya śaktiḥ syāt ||10|| 
viṣṇuḥ kaliper artho laliper etasya śaktir arthaḥ syāt | 
rudro 'dhipatiḥ śaktī raudrī syāt tatra sṛṣṭisaṃhāre ||11|| 
haravarṇayugalam anayor vācakam artho 'tra rasya rudraḥ syāt |
rudrākṣarasamparkād raudrī tacchaktir atra hasyārthaḥ ||12|| 
atra tu śaktyarṇasya prāthamyaṃ śaktibījabhūtatvāt | 
adhivasataḥ śivaśaktī saṃjñānākhyā tayos tu tritvamayī ||13|| 
kāmakalā kalayitrī turyamayī raktaśuklamiśratanuḥ | 
rakto binduḥ śaktiḥ śuklaḥ śambhuḥ paras tadaikātmyam ||14|| 
evaṃ dvitīyabījaṃ sthitirūpaṃ dakṣiṇānvayātma syāt | 
sthitisṛṣṭyādivibhedād vasanti tā eva devatās tatra ||15||

Dwiveda page 313

atra kalavarṇamadhyasthito hakāraḥ sthitisvarūpatvam | 
asya dyotayati paraṃ sthitirūpaṃ saṃvidambikākāraḥ ||16|| 
saṃhārātmakapaścimasamayamaye tadvad eva tārtīye | 
saṃhṛtisṛṣṭyādivaśād vasanti tā eva devatās tatra ||17|| 
sṛṣṭau śakter niyataprādhānyād asya śaktibījatvāt | 
svātmani saṃhṛtisṛṣṭau śivam antarbhāvya bhāsate śaktiḥ ||18|| 
trimaye turīyabīje 'nākhyārūpottarānvayātmani tau | 
śaktiśivāv adhivasato nirantaraṃ sāmarasyam āpannau ||19|| 
sṛṣṭyādibhedabhinnaśrīvidyāvarṇayugalanavakātmā |
navanādavargarūpā mātā sā madhyamā 'bhidhā vitatā ||20|| 
śabdasparśau rūpaṃ rasagandhau ceti bhūtasūkṣmāṇi | 
vyāpyavyāpakabhāvāt pañcadaśa syuḥ krameṇa tatsaṃkhyāḥ ||21||
tithayaś ca kalā nityās tadātmikāḥ syus tathaiva tatsaṃkhyaiḥ |
varṇaiḥ samaṣṭir eṣā vidyā vyāpnoti tāni sarvāṇi ||22|| 
sargādisamaṣṭirūpaḥ svāṃśairebhis tadātmanā vitataḥ |
sargeṇa kādivarṇair api ṣaṭtriṃśadbhir ātmano 'vayavaiḥ ||23|| 
punarajvyañjanabinduprabhedabhinnāṃs tadakṣarāvayavān |
ṣaṭtriṃśatsaṃkhyākāṃs tattvamayān aśnute hi sā mātā ||24|| 
vyaṣṭisamaṣṭivibhedaiś caturātmā tattvabījapīṭhamayī |
caturanvayātmanā 'pi ca mātā 'ṣṭakamātṛkāmayī vidyā ||25||

iti śrīmatpuṇyānandaśiṣyāmṛtānandayogipravaraviracite saubhāgyasudhodaye dvītīyaḥ prapañcaḥ ||

Dwiveda page 314

tṛtīyaḥ prapañcaḥ

asyāmbikāṃśabhūtā śaktiḥ (sā se?svāṃśe)na śāntayā sākam |
samarasabhāvaṃ yātā jātā jyotirmayī mahābinduḥ ||1||
saiva svecchodrekād vāmā (pa?va)manādamuṣya viśvasya |
vakrīkṛtanijarūpā sṛṣṭiḥ śṛṅgāṭavāmarekhā syāt ||2||
jyeṣṭhā jñānāveśād ṛjvī sthitir etadagrarekhā syāt | 
raudrī kriyoparāgāt saṃhṛtir etasya dakṣiṇā rekhā ||3||
ittham iyaṃ paśyantī jātā mātā trikoṇarūpeṇa |
sā 'pi caturbījavatī vidyā vedyā tadātmikā tadvat ||4||
vāmā(di?dī)cchādyaṣṭapratibimbair aṣṭakoṇam utpannam |
aṣṭatrikoṇamadhyaspandair daśabhir daśāram utpannam ||5||
asyaiva pratibimbaṃ bāhyadaśāraṃ ca bhāsamānasya | 
spandavaśād evaiṣāṃ cakrāṇāṃ samuditaṃ ca manukoṇam ||6||
dvyuttaracatvāriṃśadyonigaṇo madhyayoniparyantam |  
nādamayair navavargair madhyamayā tāvad akṣarair vyāptiḥ ||7||
vidyāṃśamayaiḥ svārṇaiḥ kādyair vargaiḥ svaraiś ca ṣoḍaśabhiḥ | 
aṣṭadvyaṣṭadalāmbujayugalaṃ vyāpnoti vaikharī devī ||8||
bījatrayamayatejas tritayavikārāś ca tāni vṛttāni | 
bhūbimbatrayam etat paśyantyāditrimātṛviśrāntiḥ ||9||
caturaśraṣoḍaśāṣṭacchadātmakacakratrayaṃ tridhā sṛṣṭiḥ | 
pūrvāmnāyo vāgbhavabījaṃ tadvat trimūrtidaivatyam ||10||

Dwiveda page 315

manukoṇaṃ dvidaśāraṃ tritayam idaṃ kāmarājabījaṃ syāt | 
sthitir atra devatānāṃ trayamapi tadvac ca dakṣiṇāmnāyaḥ ||11|| 
aṣṭatrikoṇamadhyatritayaṃ tārtīyam eṣa saṃhāraḥ |
atrāpi devatātrayam āsīd ayam eva paścimāmnāyaḥ ||12|| 
sarvam anākhyārūpaṃ turyaṃ śivaśaktidevatādhikṛtam | 
syād uttarasamayātmakam evaṃ srotomayaṃ mahācakram ||13||

iti śrīmatpuṇyānanda(śiṣyāmṛtānandayogipravaraviracite) saubhāgyasudhodaye tṛtīyaḥ prapañcaḥ ||

caturthaḥ prapañcaḥ

cittamaye śrīpīṭhe jyotirbindau yad asya saṃkrāntam | 
pratibimbaṃ paradhāmnaḥ paraliṅgaṃ tatprakortyate prājñaiḥ ||1|| 
tatra parā parameśī prakāśaśaktyātma(kā?kau) nijāvaṃśau |
nibhidya nityayogāt kāmaḥ kāmeśvarīty abhūn mithunam ||2||
sarvaiḥ svasvātmatayā kāmo devaḥ prakāmyamānatvāt | 
vaktrādyās tasyāṃśā vārādya varṇitaṃ budhair ādyaiḥ ||3|| 
paramātmikā tadīyā svecchāśaktir babhūva kāmeśī | 
icchādikās tadīyā mūrdhādyaṃśā manīṣibhiḥ kathitāḥ ||4|| 
anayor ātmāvaya(ta?va)vyāsasamāsaikarasyabhedavapuḥ |
paśyantī māteyaṃ na tattvato bhidyate tatas tābhyām ||5||

Dwiveda page 316

sā ca caturakṣarātmā tadaṃśa(pū?bhū)tāni tāni mithunāni |
catvāri vedayanti vidyā vedyā tadātmikā vibudhaiḥ ||6|| 
ādhāranavakamanayor mūlādibrahmarandhraparyantam |
navanādavargarūpā mātā vyāpnoti madhyamā devī ||7|| 
sṛṣṭyāditrayabhedair navabhir bhinnārṇayugmanavakava(ti?tī) |
navacakrarūpiṇī sā vidyā vyāpnoti tadvadādhārā(t?n) ||8|| 
ṣaṭtriṃśattattvamayaṃ śarīram anayor nijecchayopāttam |
hantādyavidyayā 'pi vyāptaṃ tāvat prakārabhinnābhyām ||9|| 
ekatriṃśatritayadvitayasamaṣṭiprakārasaṃkalitaiḥ |
tattvaiḥ svāvayavamayaiś catubhir anayos tathānvayā vyāptāḥ ||10||

iti caturthaḥ prapañcaḥ ||

pañcamaḥ paṭalaḥ (prapañcaḥ?)

śrīpīṭhaśailaśikhare paraśivabhānoḥ prakāśamānasya | 
nijaśaktiraśminikaraś cakrakramadevatātvamāyātaḥ ||1||
madhyatrikoṇakoṇe vāme śrīpūrṇapīṭham etasmin |
buddhimaye paratejaḥpratiphalitaṃ tv itaraliṅgatāṃ yātam ||2|| 
raudraḥ syād oḍḍīśaḥ kriyaiva bhagamālinī tayor mithunam | 
rudrasvaśaktirūpaṃ tṛtīyabījātmakaṃ (ta(da)dhyāste ||3||
dakṣiṇakoṇe 'haṅkṛtirūpe jālandhare tu saṃkrāntam | 
paradhāma bāṇaliṅgaṃ jātaṃ saṃkrāntyupādhibhedavaśāt ||4||

Dwiveda page 317

jyeṣṭhāṃśaḥ ṣaṣṭhīśaḥ jñānā vajreśvarī tayormithunam | 
viṣṇuviśvambharātmakam asminn adhivasati madhyabījamayam ||5||
punar eva kāmapīṭhe tadagrakoṇe sthite manorūpe |
pratiphalitaṃ tajjyotiḥ svayambhuliṅgaṃ samīritaṃ sadbhiḥ ||6||
vāmāṃśo mitreśaḥ kāmeśīcchā tayor mithunam |
brahmabrāhmīrūpaṃ vāgbhavabījātmakaṃ vasaty asmin ||7||
itthaṃ vāmādyaṃśair vāgādikabījavācyatāṃ yātaiḥ | 
vāmādiyugalarūpā jātā sā mātṛkaiva paśyantī ||8||
vasuyoniṣvadasīyaṃ puryaṣṭakam aṣṭadevatākāram | 
antardaśāracakre sarvajñādyās tadakṣasaṃcārāḥ ||9||
syuḥ sarvasiddhidādyās tadakṣaviṣayā bahirdaśāragatāḥ |
manukoṇaśaktinikaraḥ karaṇacaturdaśakam eva tadīyam abhūt ||10||
dvyuttaracatvāriṃśadyonigato devatānikāyo 'yam | 
madhyamayā navavargair vidyārṇayugātmakair abhivyāptaḥ ||11||
aṣṭakamanayor iṣṭaṃ prakṛtīnām aṣṭapatraśaktitayā |
etadvikārajātaṃ saṃjātaṃ nṛpapatradevatākāram ||12||
aṇimādiguṇanikāyas tayos tayor eva dhātusamudāyaḥ |
mudrāmayī ca sā vai caturaśratrayamaye vasaty asmin ||13||
dviradakalādalakamaladvitayagataṃ śaktiraśmicakram idam | 
vidyātmakaiḥ svakīyair varṇair vyāpnoti vaikharī mātā ||14||

Dwiveda page 318


ādhāranavakam anayor navacakrībhāvam āgataṃ śivayoḥ | 
tanmadhyacāracaturā mudrātvaṃ prāpa modanāt saṃvit ||15|| 
tannādaśaktinavakaṃ navacakreśīsvarūpam āpannam |
vidyārṇayugmanavakaṃ tadvidyānavakarūpato vitatam ||16|| 
navacakravāsinīnāṃ bhāsāṃ prakaṭādiyoginīnāṃ ca |
tāsām iva cakrāṇāṃ caturāmnāyādirūpatā jñeyā ||17|| 

iti pañcamaḥ paṭalaḥ ||

tadanādibodharūpaṃ paramānandātmakaṃ paraṃ jyotiḥ | 
sphurati yadā svātmānaṃ vimṛṣṭaṃ vidyayā 'nayā 'bhilaṣet ||1||
tadanuttarasphurattākāra(ḥ) svātmīyatattvavimraṣṭā |
paramaśivo gurur ādyaś caryānāthāparābhidhānadharaḥ ||2||
vidyānāṃ sarvāsāṃ bhinnasrotaḥparamparākāṇām | 
vāridhivara iva saritāṃ puṇyatamo bhavati yatra saṃbhedaḥ ||3||
bhinnaḥ sa eva yātaḥ kāme(śa?śī)tvaṃ vimarśabhāgena | 
śaktiḥ sā'sya niraṅkuśavibhavaṃ veleva vāridhiṃ rundhe ||4||
kṛtayugasamaye vidyām ādyām asyai vimarśarūpiṇyai | 
oḍyāṇapīṭhanilayaś caryānātho 'dhideva(te?tai)veśaḥ ||5||
etannirodhajanyā muktirjantoḥ sa eva saṃsāraḥ |
saṃsārasya ca mukteḥ saraṇiṃ śaraṇaṃ prayāmi taccaraṇam ||6||

Dwiveda page 319

seyaṃ svīyair bhinnān gurūn guṇaiḥ ṣaṣṭhamitrasaṃjñādīn |
anvagrahīdamī(ṣā?ṣāṃ) jyeṣṭho jyeṣṭhauliheturoḍḍīśaḥ ||7||
krodhamuniś cidrūpas tretāyuganāyako 'ntyabījapatiḥ |
sattvatanur bhagamālābharttā śrīpūrṇaśailapīṭhagataḥ ||8||
subrahmaṇyo madhyaḥ ṣaṣṭhīśo madhyamaulikartā ca |
prāṇātmā vajreśīnātha(ḥ) śrīkāmarājabījapatiḥ ||9||
jālandharapīṭhastho dvāparayuganāyako rajorūpaḥ |
śrīkaṇṭho mitreśo nā(thaṃ?thaḥ) kāmeśvarīmanaḥkāntaḥ ||10||
śrīkāmarūpanilayo viṣayamayo vāgbhavākṣarādhipatiḥ |
bālo bālaulikaraḥ kaliyugakālaprabhus tamomūrtiḥ ||11||
nāthair ebhiḥ parajyotiparispandaḥ prapañcaparamārthaḥ |
divyaugho 'yaṃ kathitaḥ sevyaḥ śrīvāmakeśvarīdevyāḥ ||12||
mitreśanāthamātre kaliyugasa(ndhā?ndhau) nilīya nivasantīm |
vidyām ādyām enāṃ lopāmudrā yugāditaḥ prāpat ||13||
yadananyalabdhapūrvāṃ vidyām eṣā yugādito lebhe |
tattannāmnā prathitaṃ santānam idaṃ hi sarvakāleṣu ||14||
tadanu muniḥ kalaśabhavas tābhyāṃ kaṅkālatāpasācāyaḥ |
tasmād dharmācāryo laghunutivararacanaviditavijñānaḥ ||15||
tasmādapi yogi(sa?va)rād yogeśī muktakeśinī nāma |
nānāpadānamahito dīpakanāthaḥ svasantater dīpaḥ ||16||

Dwiveda page 320

vidyām avāpa tasyā yoginyā vimalabodhabhāginyāḥ | 
etaiḥ śivāṃśabhūtaiḥ siddhaugha(ḥ) ṣaḍbhir īrito gurubhiḥ ||17||
dīpakanāthasya suto vidyāṃ tasmād avāpa jiṣṇvākhyaḥ |
atha mātṛguptadevas tasmād asmāc ca tejaso devaḥ ||18||
tasmānmanojadevas tato 'pi kalyāṇanāthayogivaraḥ |
tasmāt paramānandaḥ svātmānandas tato mahāyogī ||19||
tadanu trilocaneśo dakṣiṇasantānasiddhisantānaḥ |
etasmād deveśo mārijabādhākhyaviṣayaviditayaśāḥ ||20||
tasmāc ca keśaveśas trilocaneśāparābhidhāna(pa?dha)raḥ |
tasmāt puṇyānando (māma?mamā)mṛtānandayogino nāthaḥ ||21||
bhānuka(sumā?śubhā)vasānaṃ santānaṃ svīyam ātmano jñātvā |
samprati santatiyojitajananād ahamasmi pañcamaḥ puruṣaḥ ||22||
etair nāthair udito mānaugho mānavottamair arcyaḥ |
sarveṣāṃ tu gurūṇāṃ gopyaṃ tatpūjyanāma sāmayikam ||23||
guruvaktramātragamyaṃ na pustake lokanāmavallekhyam |
eteṣām oghānām iva gāṅgānāṃ tamo(va?pa)haṃ tritayam ||24||
vāgāditritayam ayaṃ vandyaṃ vidyāvatārasopānam |
etattritayasamaṣṭi śrīgurunāthasya pādukātritayam ||25||

Dwiveda page 321

(śi?si)taśoṇamiśrarūpaṃ turyaṃ vāgādimayatayā vedyam |
niva(sa)ti sahasrapa(te?tre) saroru(ho?he) nāthapādukārūpam ||26|| subhagatvasudhārasodayāya svagururūpāyaviśeṣaśeṣabhājaḥ | 
nijamānasamandarādamathnādamṛtānandasudhīrayugmasindhum ||27||

iti śrīmatpuṇyānandaśiṣyāmṛtānandayogipravaraviracite saubhāgyasudhodaye ṣaṣṭhaḥ prapañcaḥ || granthaś ca parisamāptaḥ ||